រថយន្តដឹកកម្មកររោងចក្របេីកបទឆ្លងផ្លូវបុកម៉ូតូចំនួន 3 គ្រឿងបណ្ដាលឲ្យរបួស4នាក់ស្រី 2នាក់ប្រុស2នាក់

ខេត្តកំពង់ស្ពឺ ៖ រថយន្តដឹកកម្មករកម្មការិនីរោងចក្របើកបទឆ្លងផ្លូវជ្រុលទៅបុកម៉ូតូ3គ្រឿងបណ្ដាលឱ្យប្រុសស្រីបួននាក់រងរបួសកាលពីរថ្ងៃទី១៤ ខែតុលា ឆ្នាំ២០២៥ នៅផ្លូវលេខ ៥១.៥ ត្រង់ចំណុចផ្លូវបំបែកជាបួនភូមិអង្គទន្លាប់ ឃុំសំរោងទង ស្រុកសំរោងទង ខេត្តកំពង់ស្ពឺ មានរថយន្ត១គ្រឿង ម៉ាក HYUNDAI ពណ៍ស គ្មានផ្លាកលេខ អ្នកបើកបរមិនស្គាល់អត្តសញ្ញាណ សមត្ថកិច្ចបន្ដការស្រាវជ្រាវ (ក្រោយកេីតហេតុចុះគេចខ្លួន) មានដឹកកម្មករ-កម្មការិនីចំនួន ៥០នាក់ ស្រី៣៥នាក់ បើកបរពីទិសខាងលិចទៅទិសខាងកើត មកដល់ចំណុចខាងលើរថយន្ដបានបេីកឆ្លងផ្លូវរួចបុកជាមួយម៉ូតូចំនួន៣គ្រឿង ដោយគ្រោះថ្នាក់នេះជាការមិនគោរពច្បាប់សិទ្ធិអត្ថិភាព ឬអាចយានយន្ដមានបញ្ហាបច្ចេកទេស ។

ករណីនេះផងដែរបង្កឱ្យម៉ូតូខូចខាត ទី១-ម៉ាក HONDA DREAM 125CC ពណ៍ខ្មៅ ពាក់ផ្លាកលេខកំពង់ស្ពឺ 1G-0112 អ្នកបើកបរឈ្មោះ ប៉ុល ស៊ុយ ភេទប្រុស អាយុ៤៦ឆ្នាំ នៅភូមិព្រៃសំបុក ឃុំព្នាយ ស្រុកសំរោងទង ខេត្តកំពង់ស្ពឺ បើកបរពីទិសខាងត្បូងទៅទិសខាងជើងរួចបត់ឆ្លងផ្លូវទៅទិសខាងលិច។ ម៉ូតូទី២- ម៉ាក HONDA DREAM 125CC ពណ៍ខ្មៅ ពាក់ផ្លាកលេខកំពង់ស្ពឺ 1X-6868 អ្នកបើកបរឈ្មោះ ឃីម ចាន់លី ភេទប្រុស អាយុ៣៤ឆ្នាំ ឌុបប្រពន្ធឈ្មោះ ស៊ុន ខ្នា អាយុ៣០ឆ្នាំ រស់នៅភូមិអាយាន ឃុំពាំងល្វា ស្រុកសាមគ្គីមុនីជ័យ ខេត្តកំពង់ស្ពឺ បើកបរពីទិសខាងជើងទៅទិសខាងត្បូងរួចបត់ទៅទិសខាងកើត។

ម៉ូតូទី៣- ម៉ាក HONDA DREAM 125CC ពណ៍ខ្មៅ ពាក់ផ្លាក់លេខភ្នំពេញ 1CO-5875 អ្នកបើកបរឈ្មោះ ហេង ស៊ុន ភេទស្រី អាយុ២៥ឆ្នាំ នៅភូមិពាំងកំផ្លង ឃុំពាំងល្វា ស្រុកសាមគ្គីមុនីជ័យ ខេត្តកំពង់ស្ពឺ បើកបរពីទិសខាងជើងទៅទិសខាងត្បូងរួចបត់ទៅទិសខាងកើត។

ករណីខាងលើបណ្ដាលឱ្យគ្រោះថ្នាក់មនុស្ស និងខូចខាតសម្ភាររបួសមនុស្ស ៤នាក់ ស្រី២ (ភាគីម៉ូតូ) ខូចម៉ូតូ៣គ្រឿង ខូចរថយន្ត ១គ្រឿង។

សមត្ថកិច្ចនគរបាលចរាចរណ៍បានចុះដល់ទីតាំងកេីតហេតុនិងបានចាប់យកវត្ថុតាង ម៉ូតូចំនួន៣គ្រឿង និងរថយន្ត១គ្រឿង យកមករក្សាទុកនៅប៉ុស្តិ៍នគរបាលរដ្ឋបាលសំរោងទង នៃអធិការដ្ឋាននគរបាលស្រុកសំរោងទង ខេត្តកំពង់ស្ពឺបន្តស្រាវជ្រាវរកអ្នកបើកបររថយន្ត ដើម្បីដោះស្រាយតាមនីតិវិធី។ដោយ៖ចិត្ត្រា